هەواڵی زانستی

بیرۆکەی بڵاوکردنەوەی هەواڵە زانستییەکان لە دونیای مەجازیدا لێرەوە سەری هەڵدا کە بەداخەوە بەگشتی لە میدیای کوردی لە ئاستێکی زۆر کەمدا گرنگیی پێ دراوە، هەر بۆیە ڕێکخراوەی زانستی- فەرهەنگیی هۆژان لای وا بوو کە دەکرێت لەم بوارەدا دەست ببزێوێت و کەلێنێکی بچکۆلەی ئەم بۆشاییە پڕ کاتەوە و بەم چەشنە ڕچە بشکێنێت. هەروەها هیوادارە بتوانێت سەرنجی چینی هۆگری زانست ڕابکێشێت و گرنگیی زانست و توێژینەوە زانستییەکان و ئاکامەکانی لە هەموو بوارەکانی ژیاندا بۆ بەردەنگانی دیکەش زیاتر دەربخات.
هۆژان لە سەرەتاوە مانگێک جارێک، دواتر دوو حەوتە جارێک و ئێستاش هەوڵی داوە حەوتەی جارێک کورتەیەک لە هەواڵەکانی دونیای زانست پێشکەش بکات و ئاواتەخوازیشە لە داهاتوودا بتوانێت بە هاوکاری تیمێکی گەورەتر شرۆڤەی هەواڵەکان بڵاو بکاتەوە.
دەسا بەڕێوەبەرایەتیی بەشی هەواڵە زانستییەکان بۆ بەردەوامبوون و باشتر ئاراستەکردنی هەواڵەکان چاوەڕوانی هاوکاری هەموو ئەو کەسانەیە کە دەتوانن لەم بوارەدا یارمەتیدەر بن و لە بەردەنگان دەخوازێت بە دەربڕینی ڕەخنە و پێشنیارەکانیان بەستێنێک بۆ گەشەی فراوانی ئەو بەشە فەراهەم بێنن.