هاکاسولی ڕووداوێکی تەکنۆلۆجیای زانیاری کە لە هەرێمی کوردستان بەڕیوە دەچێت

هاکاسۆن (Hackathon) چییە؟

دەتوانین بڵێین کە “ماراسۆنی داهێنان”، گونجاوترین شرۆڤەیە کە بۆ وشەی هاکاسۆن کرابێت. هاکاسۆن لە دوو وشەی هاک (hack) و ماراسۆن (marathon) پێکهاتووە. هەر کەسێک خوازیار و تامەزرۆی دنیای زانیاری و تەکنۆلۆجیا بێت دەتوانێت بەشدار بێت لە پێشبڕکێکانی هاکاسۆن، زانیاریی نوێ وەربگرێت و هەروەها لە بڕەوپێدان و بەرەوپێشچوونی کۆمەڵگاش هاوکار بێت.

هاکاسولی (HackaSuly) چییە؟

هاکاسولی (HackaSuly)، دەکرێت بەو شێوازە شی بکرێتەوە کە لە دوو وشەی هاکاسۆن (Hackathon) و سلێمانی (Sulaymaniyah) پێکهاتووە. هاکاسولی بە یەکێک لە گەورەترین پێشبڕکێ نێودەوڵەتییەکان لە بواری تەکنۆلۆجیای زانیاری لە عێراق و هەرێمی کوردستان دادەنرێت. مەبەست لەو پێشبڕکێیە چارەسەرکردن و زاڵبوونە بەسەر ئەو کێشە و گرفتانەی لە بواری تەکنۆلۆجیای زانیاری لە بەردەم کۆمەڵگادایە. ئەو پێشبڕکێیە ڕووداوێکی گرینگە کە دووەم جارە لە شاری سلێمانی بەڕێوە دەچێت و کۆمەڵێک پرۆگرامەر و گەشەپێدەر بە بیرۆکە و داهێنانی نوێوە تێیدا بەشدار دەبن. ئیڤێنتەکە لە بەرواری 5 تا 7ی سێپتامبەری 2019 لە زانکۆی ئەمریکی لە شاری سلێمانی بەڕێوە دەچێت. پڕۆسەکە بەو شێوازەیە کە پێشبڕکێیەکی بەردەوام دەبێت بۆ ماوەی 48 کاتژمێر کە پرۆگرامەر و گەشەپێدەرەکان لەو ماوەیەدا هەر لە ناو هۆڵی زانکۆ دەمێننەوە و ئەو بیرۆکانەی کە مەبەستیانە، لەو ماوە دیاریکراوەدا پێویستە ئامادەی بکەن و بۆ دوایین ڕۆژ بیخەنە بەردەستی ئەو پسپۆڕ و شارەزایانەی کە پڕۆژەکان هەڵدەسەنگێنن. لە کۆتاییدا باشترین پڕۆژەکان دەستنیشان دەکرێن و خاوەن بیرۆکەکان خەڵات دەکرێن.

سەرچاوە:

https://www.hackasuly.com/

ئامادەکردن: دۆلان هێرش