لە بەشی یەکەمی ئەم بابەتە باسی تایبەتمەندییەکانی ئەم دارە و سوودەکانی کرا، لەم بەشەدا باسی دۆخی پێویست بۆ پەروەردەکردنی ئەم دارە دەکەین؛
ڕووناکی: داری جینکۆ پێویستی بە خۆری ڕاستەوخۆیە. ئەگەرچی لە سێبەریشدا دەڕوێت بەڵام لە شوێنێک کە ڕاستەوخۆ خۆری لێ بدات باشترە.
پلەی گەرمی: ٣- تا ٢١ پلە باشترین پلەی گەرمایە بۆ گەشەی ئەم دارە هەرچەند بەرگەی ٢٨- تا ۴٠ پلەش دەگرێت.
خۆڵ: داری جینکۆ لە زۆربەی خۆڵەکان -چ خۆڵی ترش* یان ئەلکالیدا*- گەشە دەکات بەڵام ئەو خۆڵە دەبێت ئاوەڕۆیەکی* باشی هەبێت و هەروەها باشتره لمی زۆر بێت. باشتر وایە PHی خۆڵەکە لە نێوان ۵ بۆ ۵.۵ بێت.
لێکۆڵینەوەکان دەڵێن ڕواندنی ئەو دارە دەکرێت وەکوو پلانێکی ئابووری-جوانکاری سەیر بکرێت کە سوودی زۆری هەیە و ئاکامی باشی لێ دەبێتەوە.
بەپێی هەواڵێکی ماڵپەڕی ku.964media.com ماوەیەک لەمەوبەر تیمێکی توێژینەوە ئەم دارەیان لە شاری هەولێر چاندووە و لێکۆڵینەوەی لەسەر دەکەن. بەڕێز عه‌بدولسه‌مه‌د مه‌حموود ساڵح به‌ڕێوه‌به‌رى توێژینه‌وه‌ى کشتوکاڵى هه‌ولێر لەو بارەوە گوتی: “وه‌کوو قۆناغى یه‌که‌م له قه‌زاى مێرگه‌سۆر ئه‌و داره‌مان چاند و له قۆناغه‌کانى داهاتووش هه‌ندێک ناوچه‌ى هاوشێوه‌ى مێرگه‌سۆر بۆ چاندنى دیاری ده‌که‌ین” و لە درێژەی باسەکە سێ ئامانجی بۆ چاندنی ئەم دارە دیاری کردووە:
یەکەم: جینکۆ دارێکی پزیشکییە و گه‌ڵاکەی بۆ چاره‌سه‌ریی زۆر نه‌خۆشی به‌کار دێت کە یەکیان گەڕانەوەی یادەوەرییە.
دووهه‌م: زیادکردنی جۆرێکی تازه‌ی داره که سوودی بۆ پاککردنه‌وه‌ی ژینگه‌ی کوردستان هەیە، چونکه دارەکە توانایه‌کی باشی بۆ هه‌ڵمژینی گازه زیانبه‌خشه‌کان هه‌یه.
سێهه‌م: زێدەکردنی جوانییه‌کی دیکه به سروشتی هەرێمی کوردستانە، چونکه کاتێک له وه‌رزی پایز گه‌ڵاکانی ده‌وه‌رێت جوانییه‌کی ئه‌فسووناوی به شوێنه‌که ده‌به‌خشێت و ده‌بێته هۆی راکێشانی سەرنجی گەشتیاران.
خاکی ترش: Acid Soil
خاکی ئەلکالی: Alkaline Soil
ئاوەڕۆکردن: Drainage
ئامادەکردن: ئیحسان ئیزەدی
هەڵەگر: ئیدریس قادری
