ساڵانە ملیۆنان کەس لە سەرانسەری جیهان بەهۆی خۆراکە ماوەبەسەرچووەکان نەخۆش دەکەون، چونکە کەپۆی مرۆڤ ناتوانێت هەموو مەترسییەکان بدۆزێتەوە. بۆ چارەسەری ئەو دیاردەیە، توێژەرانی زانکۆی کالیفۆرنیا لە بێرکلی¹ بە سەرپەرشتیی کارلا باسیل²، چیپێکی ئەلیکترۆنیی بچووکیان چێ کردووە، ئەو چیپە کەپۆیەکی دەستکردە و بەوردی و خێراییەکی زیاتر لە کەپۆی مرۆڤ بۆنی خۆراکە ماوەبەسەرچووەکان دەدۆزێتەوە.
تایبەتمەندییە سەرەکییەکانی بریتین لە:
پێکهاتەی فیزیکی: چیپەکە لە ١۶ هەستەوەری گازی لە بۆریی نانۆیی کاربۆن پێک هاتووە، کە لە پلەی گەرمیی ناو ماڵ کار دەکەن و بە شێوازێکی ئاسان و لە یەک قۆناغدا بەرهەم دەهێنرێن.
ژیریی دەستکرد: بە تەکنەلۆجیای فێربوونی ماشێن، سیستمەکە نەخشەی گازی دەخوێنێتەوە. وردبینیی گشتیی مۆدێلەکە %٩٢.۶ بووە، لە کاتێکدا لە دیاریکردنی تێکچوونی خۆراکدا گەیشتووەتە %٩٩.
ئەم توێژینەوەیە لە گۆڤاری سانیس ئەدوانسدا³ بڵاو کراوەتەوە. لە داهاتوودا، بەرهەمهێنەران دەیانەوێت ئەم کەپۆ ئەلیکترۆنییە بخەنە ناو ساردکەرەوە زیرەکەکان یان لە ڕێگەی ئەپی مۆبایلەوە بەکاری بهێنن، بۆ ئەوەی بەکارهێنەران لە کاتی ماوەبەسەرچوونی خواردنەکانیان ئاگادار بکرێنەوە و تەندروست بمێننەوە.
1- University of California, Berkeley
2- Carla Bassil
3- Science Advances
ئامادەکردن: زانا نەقشبەندی
هەڵەگر: سەیران حوسەینی
