کەنەدا تا ٢٠٣٥ فرۆشی ئۆتۆمبێل به بزوێنەری سووتانی ژوورەکی قەدەغە دەکات
وەک بەشێک له بەرنامەی کەنەدا بۆ بەرەنگاربوونەوەی گۆڕانکارییەکانی کەشوهەوا، ئەم وڵاتە ڕایگەیاند تا ساڵی ٢٠٣٥ فرۆشتنی ئۆتۆمبێل و لۆریی بچووک به بزوێنەری سووتانی ژوورەکی قەدەغە دەکات. پێشتریش بەریتانیا ڕایگەیاندبوو تا ٢٠٣٠ فرۆشتنی ئۆتۆمبێل به بزوێنەری سووتانی ژوورەکی قەدەغە دەکات و هەروەها نەرویژ ئەم یاسایه لە ٢٠٢٥ەوە دادەنێت. گەرچی وەلانانی سووتەمەنیی فۆسیل بۆ ئۆتۆمبێلەکان کارێکی پێویسته بەڵام ئاستەنگییەکی گەورەیە لەسەر ڕێگەی وڵاتانێک کە کەشوهەوای ساردیان هەیە. ئۆتۆمبێلە کارەباییەکان لە کەشوهەوای سارددا تا ڕادەیەکی بەرچاو کارامەییان دادەبەزێت و کاتێکی زۆرتر دەخایەنێت تاکوو بارگاوی ببنەوە. بەپێی لێکۆڵینەوەی ساڵی ٢٠١٩ی AAA (ڕێکخراوەی ئەمریکیی ئۆتۆمبێل)، دەرکەوت که لە هەوای ٦- پلە، بە هۆی کارکردنی سۆبەی ئۆتۆمبێل و گەرمکەرەوەی کورسییەکان، مەودای ڕێپێوانی بزوێنەری کارەبایی ٤٠٪ دادەبەزێت. لە لێکۆڵینەوەیەکی دیکەدا، دەرکەوت کاتێک باتری ئۆتۆمبێلێکی تایبەت لە هەوای ٢٥ پلە بارگاوی بکرێت، لە ماوەی ٣٠ خولەکدا دەگاته ٨٠٪ی لووتکەی خۆی بەڵام لە هەوای ٠ پلەدا، ئەم کاره ٤٠ خولەک دەخایەنیت. بۆیە لەو وڵاتانەی کە کەشوهەوای ساردیان هەیە، بارگاویکردنی باتری ئۆتۆمبێله کارەباییەکان ماوەیەکی زۆرتر دەخایەنێت.
وەرگێڕ: کەریم بایرامی
چاودێری زمانی: ئەستێرە چابوک
