کاتێک هێلکەیەک دەشکێنین دەزوولەیەکی سپی دەبینین کە بە زەردێنەکەیەوە نووساوە. بڕوای باوی کوردەواری دەڵێت: ئەمە تۆوی کەڵەبابە! بەڵام لە ڕاستیدا تۆو نییە.
کاتێک زەردێنەی هێلکە پێک دێت، لەنێو سپێنەکەدا دەسووڕێت و لەم پرۆسەیەدا لە سەر و خوارەوەی هێلکەکە ئەم ڕیشاڵە پڕۆتینییانە ساز دەبن کە بە زمانی زانستی پێی دەڵێن: چاڵازای (Chalazae).
ڕۆڵی ئەم دەزوولانە لەنێو هێلکەدا چییە؟
ئەم دەزوولانە کاریان ئەمەیە کە زەردێنە لە ناوەڕاستی هێلکەدا ڕابگرن و وەک پشتێندێکی ئەمنی وانە بۆ هێلکە.
هەرچەند ئەم دەزوولانە ئەستوورتر بن باشترە و یەکێک لە نیشانەکانی تازەبوونی هێلکەیە.
لەنێو هێلکەی کۆندا دەزوولەکان زۆر بچکۆلەترن یان هەر نەماون.
خواردنیشیان کەڵکی زۆری هەیە. چونکە تەواو پڕۆتینن و هیچ پەیوەندییەکیشیان بە تۆوەوە نییە.
وەرگێڕ: ئەوین سەعیدی کارناسی ڕاوێژکاریی خواردنی دایکان و منداڵان
چاودێری زمانی: حەسەن مووسازادە
سەرچاوە: Egg Bioscience and Biotechnology/Yoshinori Maine
